പകലിന്നക്കരെ മകരസന്ധ്യ തന്
രുധിരജാലകമടഞ്ഞിരിക്കുന്നു.
സ്മൃതിജലം നിറച്ചൊരു ഹൃദയത്തിന്
സ്ഫടികഭാജനമൊഴിഞ്ഞിരിക്കുന്നു.
ഘടികാരത്തില് ഞാന് മറന്ന കാലത്തിന്
ചിറകടി പോലും നിലച്ചിരിക്കുന്നു.
മനസ്സിലുള്ളതീ മരണവീടിന്റെ
മഹാമൗനം മാത്രം.
ശിരസ്സിലുള്ളതീയപസ്മാരത്തിന് മുള് -
ക്കിരീടവും മാത്രം.
ഒരു വെള്ളത്താളും,
വരണ്ട പേനയും,
മരവിപ്പും മാത്രം.
അതിഥികളാരും വരുവാനില്ലിനി.
വിഫല സൗഹൃദം പകരാനില്ലിനി.
മിഴികളില് മഞ്ഞിന് യവനിക വീണു,
ഇരുളിനുള്ളിലെന് നിഴല്പ്പാടു മാഞ്ഞു,
ഒരു വരിപോലും കുറിച്ചുവെയ്കാതെ
എനിക്കുമാത്രം ഞാന് മരിച്ചിരിക്കുന്നു.
No comments:
Post a Comment