Saturday, October 29, 2011

ഒരു വളവില്‍ വെച്ച് :പവിത്രന്‍ തീക്കുനി

കഥകള്‍ പകുത്തും
വ്യഥകള്‍ മറന്നും
കവിത പറഞ്ഞും
കള്ളുമോന്തിയും
പ്രണയത്തിറ കെട്ടിയാടിയും
കനല്‍ക്കാവടിയേന്തിയും
വീതികുറഞ്ഞ വഴിയിലൂടെ
നാമിങ്ങനെ കടന്നുപോകെ

ഒരു വളവില്‍വെച്ച്‌
നിനക്കെന്നെ നഷ്ടപ്പെടും
സ്നേഹിച്ചും കലഹിച്ചും പങ്കുവച്ചും
ആര്‍ത്തി തീര്‍ന്നിട്ടില്ലെങ്കിലും
അങ്ങനെത്തന്നെ സംഭവിക്കും
മഞ്ഞിലും മഴയിലും
വെയിലിലും നിലാവിലും
ഇരുളിലും
ചെന്നിരിക്കാറുള്ള എല്ലാ ചെരിവുകളിലും
നീയെന്നെ തേടിക്കൊണ്ടേയിരിക്കും

തെറ്റിപ്പോകും
നിന്റെ കണക്കുകളെല്ലാം
വറ്റിപ്പോകും
പ്രതീക്ഷകളെല്ലാം
പണിതീരുന്നതിനിടയില്‍ പിളര്‍ന്നുപോകുന്ന
നിന്റെ അരകല്ലുപോലെ

ഞാനുണ്ടാവും
ഓര്‍മ്മകളില്‍
നീ കറുക്കുന്നതും വെളുക്കുന്നതും
ചുവക്കുന്നതും കണ്ടുകൊണ്ടെപ്പൊഴും

മറ്റെവിടെയുമല്ല
വരാന്തയില്‍ത്തന്നെ,
നിന്റെ ഹൃദയത്തിന്റെ.

4 comments:

  1. ആദ്യായ ഇവിടെ ..ഒരു നല്ല സംരംഭം ..നന്ദി ..

    ReplyDelete
  2. ഞാനുണ്ടാവും
    ഓര്‍മ്മകളില്‍
    നീ കറുക്കുന്നതും വെളുക്കുന്നതും
    ചുവക്കുന്നതും കണ്ടുകൊണ്ടെപ്പൊഴും..!

    ആശംസകളോടെ..പുലരി

    ReplyDelete
  3. ഓര്‍മ്മകളില്‍
    നീ കറുക്കുന്നതും വെളുക്കുന്നതും
    ചുവക്കുന്നതും കണ്ടുകൊണ്ടെപ്പൊഴും

    മറ്റെവിടെയുമല്ല
    വരാന്തയില്‍ത്തന്നെ,
    നിന്റെ ഹൃദയത്തിന്റെ.

    ReplyDelete
  4. എനിക്കിഷ്ടമുള്ള ഒരു കവിയാണ്‌ പവിത്രന്‍ തീക്കുനി.. ചിലര്‍ അദ്ദേഹത്തെ പൈങ്കിളി കവിയാക്കിയാലും...:)

    ReplyDelete